ပဲခူးတိုင်းအနောက်ခြမ်း၊ ပြည်ခရိုင်၊ ရွှေတောင်မြို့နယ်ထဲက ကျေးရွာအချို့မှာ စစ်မှုထမ်းကင်းလွတ်ဖို့နဲ့ ထောက်ပံ့ဖို့ဆိုပြီး ငွေကြေးကောက်ခံနေဆဲပဲလို့ ဒေသခံတွေဆီက သိရပါတယ်။
ရွှေတောင်မြို့နယ် ရှားပင်ကုန်းကျေးရွာအုပ်စု၊ ရှားပင်ကုန်းကျေးရွာ နဲ့ ဆင်ကျွန်းကျေးရွာတွေမှာ ယမန်နေ့ မေလ ၁ ရက်နေ့ ညနေက ၁ အိမ်ထောင်ကို ကျပ် ၃၅၀၀၀ စီ ကောက်ခံခဲ့တယ်လို့ ဒေသခံတွေက ပြောပါတယ်။
“ရွာသားတွေက မထည့်ပေးချင်တော့ဘူး။ လတိုင်းအသုဘစားရိတ်ထည့်ပေးနေရတာ။” လို့ ဒေသခံအမျိုးသမီးတဦး ကပြောပါတယ်။
ဒါ့အပြင် သောင်ပြင်ကုန်းကျေးရွာအုပ်စုထဲက သောင်ပြင်ကုန်းရွာနဲ့ ကန့်လန့်ကုန်းရွာတွေမှာလည်း ဧပြီလ ၃၀ ရက်နေ့က ၁ အိမ်ထောင်ကို ကျပ်၂၅၀၀၀ ကိုကောက်ခံ ခဲ့သေးတယ်လို့ သိရပါတယ်။
“စားဝတ်နေရေးခက်ခဲနေသူတွေ အတွက်က ပိုဆိုးတယ်။ ကိုယ်စားဖို့ထက် သူတို့ကိုပဲ ထည့်ပေးနေရတယ်။ လတိုင်းပဲ အုပ်ကြီးတွေကလည်း သူတို့မျက်နှာရဖို့အတွက်ပဲ ကြည့်နေတယ်” လို့ ဒေသခံတဦးက ပြောပါတယ်။
ရှားပင်ကုန်းကျေးရွာမှာ အိမ်ခြေ ၇၃ အိမ်ရှိပြီး ဆင်ကျွန်းကျေးရွာမှာတော့အိမ်ခြေ ၁၂၀ ဝန်းကျင်ရှိတယ်လို့ ဒေသခံတွေဆီက သိရပြီး စစ်မှုထမ်းကင်းလွတ်ဖို့အတွက် လစဉ်ပေးဆောင်နေရတာလို့ ဆိုပါတယ်။
