🟥 စစ်ကော်မရှင်က ထိန်းသိမ်းရွေ့ပြောင်း၊ ဖမ်းဆီးချုပ်နှောင်မှုတွေ ပြုလုပ်ထား
နိုဝင်ဘာ ၂၇၊ ၂၀၂၅။
ပဲခူးတိုင်းအနောက်ခြမ်း၊ သာယာဝတီခရိုင်၊ ကြို့ပင်ကောက်မြို့နယ် မှာ စီမံအုပ်ချုပ်ရေးအဖွဲ့ ဗိုလ်မှူးနဲ့ မြို့နယ်အုပ်ချုပ်ရေးမှူး တို့ စကားများရန်ဖြစ်ရာက ပစ်ခတ်မှုတွေ ဖြစ်ခဲ့တယ်လို့ ဒို့ပြည် က စုံစမ်းသိရပါတယ်။
ပြီးခဲ့တဲ့ နိုဝင်ဘာလ ၂၃ ရက်နေ့ က မြို့နယ် အစည်းအဝေးမှာ မြို့နယ်စီမံအုပ်ချုပ်ရေးအဖွဲ့ အဖွဲ့ဝင် (၁) ဗိုလ်မှူးရန်နိုင်စိုး နဲ့ မြို့နယ်စီမံခန့်ခွဲရေးနဲ့အုပ်ချုပ်ရေးကော်မတီဥက္ကဋ္ဌဦးအောင်ကျော်ဇေယျ တို့ဟာ စကားများရန်ဖြစ်ခဲ့ကြပြီး ညပိုင်းမှာ ဗိုလ်မှူးက သူ့လက်အောက်ငယ်တွေကို ပစ်ခတ်ခိုင်းခဲ့တာလို့ နီးစပ်သူတွေက ဆိုပါတယ်။
“အရင်ထဲကသူတို့မတည့်ကြဘူး စစ်မှုထမ်းကနေရလာတဲ့ငွေတွေ မြို့ကပိုက်ဆံရှိတဲ့သူတွေဆီက ခြိမ်းခြောက်ငွေတောင်းတာတွေလုပ်ကြပြီး ဝေစုခွဲတာမကျနပ်ကြတာ။ ဖြစ်တဲ့နေ့က အစည်းအဝေးမှာထဲက ရန်ဖြစ်နေကြတာ။ ညရောက်တော့အရက်မှူးပြီး ဗိုလ်မှူးက သူ့တပည့်တပ်ကြပ်ကြီး ကိုပစ်ခိုင်းတယ်။” လို့ အုပ်ချုပ်ရေးနဲ့ နီးစပ်သူက ပြောပါတယ်။
ပစ်ခတ်မှုမှာ ထွေအုပ်ဝန်ထမ်းအိမ်ရာရှိ အုပ်ချုပ်ရေးမှူးအိမ်ကို အဓိကပစ်မှတ်ထား ပစ်ခတ်ခဲ့ပြီး အချက်ပေါင်း (၄၀) ခန့် ရှိကာ နေအိမ်နဲ့ ကားပျက်စီးမှုတွေ ရှိခဲ့တယ်လို့ သိရပါတယ်။
“ထွေအုပ်ရုံးထဲက အုပ်ချုပ်ရေးမှူးအိမ်ကိုပစ်တာ အချက်ရေအများကြီးပဲ အပြင်ကပဲပစ်တော့လူထိခိုက်မှုမရှိဘူး” လို့ နီးစပ်သူက ဆက်ပြောပါတယ်။
ဖြစ်စဉ်ဖြစ်ပွားပြီးနောက် ဗိုလ်မှူးကို တပ်ရင်းက ပြန်လည်ခေါ်ဆောင်စစ်ဆေးနေပြီး အုပ်ချုပ်ရေးမှူးကိုလည်း နယ်ပြောင်းကာ ပစ်ခတ်မှုအဓိကပြုလုပ်ခဲ့တဲ့ တပ်ကြပ်ကြီးကို အချုပ်ချဖမ်းဆီးထားတာတွေကို စစ်ကော်မရှင်က ပြုလုပ်ပြီး သတင်းကို ဖုံးဖိထားတယ်လို့ သိရပါတယ်။
“ပြည်သူကိုဖိနှိပ်ပြီး ပြည်သူ့ရဲ့မျက်ရည်တွေနဲ့အပူတွေဟာ ဖိနှိပ်သူတွေအဖို့ ကျိန်စာထက်ကြောက်ဖို့ ကောင်းတယ်။ ပြည်သူ့မေတ္တာဆူးနေကြတာပါ။” လို့ ဒေသတွင်း နိုင်ငံရေးတက်ကြွလှုပ်ရှားသူတဦးက ဒို့ပြည် ကို မှတ်ချက်ပေးပါတယ်။
အခုလိုဖြစ်စဉ်တွေနဲ့ပတ်သက်ပြီး စစ်ကော်မရှင်အနေနဲ့ သူလက်အောက်ငယ်သား အဖွဲ့အစည်းတွေကို ထိန်းသိမ်းနိုင်မှု လျော့နည်းနေတာဖြစ်ပြီး အောက်ခြေမှာလည်း တပ်နဲ့အခြားအဖွဲ့အစည်းတွေကြား ပွတ်တိုက်မှု မကျေနပ်မှုတွေ နေ့စဉ် ဖြစ်နေတယ်လို့ နိုင်ငံရေးသမားတွေက ပြောဆိုသုံးသပ် ပါတယ်။
စစ်ကော်မရှင်လက်အောက်ခံ တပ်၊ အုပ်ချုပ်ရေး၊ ပြည့်သူ့စစ် နဲ့ ရဲတွေဟာ စစ်မှုထမ်းတပ်သားသစ်ဖမ်းဆီးပေါ်တာဆွဲ ရောင်းချလူစားထိုးငွေညှစ်တာတွေကနေ အကျိုးအမြတ်များစွာရနေကြပြီး ပဲခူးတိုင်းအနောက်ခြမ်းမြို့နယ်တွေမှာ ဖမ်းဆီးခံရမှု နေ့စဉ်ဆိုသလို ဆိုးဆိုးရွားရွား ဖြစ်နေပါတယ်။
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
