နိုဝင်ဘာ ၂၇၊ ၂၀၂၅။
ပဲခူးတိုင်းအနောက်ခြမ်း၊ ပြည်မြို့နယ်၊ ပေါင်းတလည်မြို့ ဆင်မြီးဆွဲလမ်းဆုံ မြို့မကျောင်းအနီး ထရန်စဖော်မာနားမှာ ထောင်ထားတဲ့ ကြံ့ခိုင်ရေးပါတီမဲဆွယ် ဆိုင်းဘုတ်လဲတာကို စနောက်ပြီးရယ်မိသူ အသက်(၆၀) အရွယ် ဦးအုန်းမြင့် ကို ဖမ်းဆီးသွားခဲ့တယ်လို့ မြို့ခံတွေက ဒို့ပြည် ကိုပြောပါတယ်။
အဲဒီမဲဆွယ်ဆိုင်းဘုတ်ကို ပြီးခဲ့တဲ့ ၂ ရက်ခန့်က ဝါးနဲ့ထောင်ထားရာမှာ ယမန်နေ့ နိုဝင်ဘာ ၂၆ ရက်နေ့ ညနေက (၁) ကြိမ်လဲကျခဲ့ပြီး ယနေ့ နိုဝင်ဘာ ၂၇ ရက် နံနက် ၁၀ နာရီခန့်က ဟော်လိုသံတန်းတွေနဲ့ ဂဟေဆော် ပြန်ထောင်ရာမှာလည်း လဲကျခဲ့တဲ့အတွက် အနီးနားမှာရှိနေကြသူတွေက စနောက်ရယ်မောခဲ့တာလို့ မြို့ခံတွေက ပြောပါတယ်။
“ပထမထောင်ထားကဝါးလုံးလေးနဲ့ ထောင်ထားတာ အဲဒါကမနေ့ကပြုတ်ကျပြီးလဲသွားတာ ။ အခုမနက်ကျတော့ ဟော်လိုနဲ့ ပြန်ထောင်တာ ဂဟေတို့ထားတာက ဒီနေ့မနက်ပြုတ်ကျပြန်တာ အဲဒါကိုသရော်မိတာကို ဖမ်းခိုင်းတာပါ။ ဘာမှပြောတာမဟုတ်ဘူး မခိုင်လို့ပြုတ်ကျတာပဲကွာ အဲဒါလေးပြောတာပါ” လို့ မြို့ခံအမျိုးသားတဦးက ဒို့ပြည် ကို ပြောပါတယ်။
စနောက်နေကြချိန် ပေါင်းတလည် ပျူစောထီးပြည်သူ့စစ်ခေါင်းဆောင်လှမြင့်(သေဆုံး) ရဲ့ သားချိုကြီးက ပျူစောထီးခေါင်းဆောင်တဦးဖြစ်သူ ဝင်းဇော်ကို ဖုန်းဆက်ခေါ်တိုင်တန်းခဲ့လို့ ဝင်းဇော်ကတဆင့် ရဲကို ဖုန်းဆက်ဖမ်းဆီးခိုင်းခဲ့တာလို့ ဆိုပါတယ်။
“အဖမ်းခံရတာက ပေါင်းတလည်မြို့ မြောက်ပိုင်းက အသက်(၆၀) အရွယ်ဦးအုန်းမြင့်ပါ။ ဝင်းဇော်နဲ့လည်း သိကြပါတယ်။ တမင်ကိုဖမ်းခိုင်းတာ ဘာမှမဟုတ်တာလေးတခုနဲ့တောင် လူတယောက်ကိုလုပ်ချင်သလို လုပ်နေတာ မဖြစ်သင့်တော့ဘူးထင်ပါတယ်” လို့ မြို့ခံအမျိုးသမီးတဦးက ဒို့ပြည် ကိုပြောပါတယ်။
ဝင်းဇော်ဟာ ပေါင်းတလည်တောင်ပိုင်းအုပ်ချုပ်ရေးမှူး ပျူစောထီးခေါင်းဆောင် ကြံ့ခိုင်ရေးအမာခံဖြစ်ကာ စစ်တပ်အာဏာသိမ်းပြီးနောက် မှ တက်လာသူ ဖြစ်ပြီး မြို့မှာ လူငယ်တွေကိုဖမ်းဆီးခိုင်းတာ၊ ပေါ်တာဆွဲတာ၊ သတင်းပေးတာတွေကို လုပ်ဆောင်နေပြီး ဆိုးသွမ်းဗိုလ်ကျနေတယ်လို့ မြို့ခံတွေက ပြောပါတယ်။
ဖမ်းဆီးခံရသူ ဦးအုန်းမြင့်ကိုတော့ ယနေ့ ညနေပိုင်းမှာ နေအိမ်မှာတွေ့ခဲ့ရတယ်လို့ မြို့ခံအချို့က ပြောဆိုကြပြီး ဒို့ပြည်က အတည်ပြုဖို့ကြိုးစားနေပါတယ်။
ပုံစာ-ပြည်မြို့နယ်မှာ ကြံ့ခိုင်ရေးပါတီမဲဆွယ်ဆိုင်းဘုတ် ဆိုင်ထူကြစဉ်။
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
