နိုဝင်ဘာ ၂၉၊ ၂၀၂၅။
ပဲခူးတိုင်းအနောက်ခြမ်း၊ နတ်တလင်းမြို့အနောက်ခြမ်းမှာရှိတဲ့ ကျေးရွာ ၂၀ ခန့်က ကြံ့ခိုင်ရေးပါတီမဲဆွယ်ဆိုင်းဘုတ်တွေ မီးရှို့ခံခဲ့ရတယ်လို့ ဒေသခံတွေဆီက သိရပါတယ်။
ပြီးခဲ့တဲ့ နိုဝင်ဘာ ၂၆ ရက်နေ့ ည က ထိပ်ပိတ်၊ ကွက်ကြိး၊ ရွှေကြာပင်၊ အောင်ပင်သာ၊ လှပခြင်း၊ ပွတ်စု၊ နွယ်ခွေ၊ လဲတော၊ တောင်ယာတော၊ ရေမွေး၊ ချောက်ခမ်း၊ ကုလားတက်တွင်း၊ တောင်ရေကန်၊ အောင်ချမ်းသာ၊ ချင်းကုန်းကံ၊ ပွဲသာ၊ ကြာကံ၊ လှေကြပ်ကုန်း၊ ဂွေးကြီး၊ ဂွေးလေး ရွာတွေမှာ စိုက်ထူထားတဲ့ ကြံ့ခိုင်ရေးပါတီမဲဆွယ် ဆိုင်းဘုတ်တွေကို မီးရှို့ခံခဲ့ရတာလို့ သိရပါတယ်။
“အဲနေရာတွေက စစ်ကောင်စီစိုးမိုးထားတာပါ။ ရွာ ၂၀ ဝန်းကျင်ပဲ တပြိုင်တည်းမီးရှို့ပြီး ညတွင်းချင်းပြေးကြတာ။” လို့ ဒေသခံအမျိုးသားတဦးက ဒို့ပြည် ကိုပြောပါတယ်။
မီးရှို့မှုဖြစ်ပွားပြီး နောက်ရက်မှာတော့ တာပွန်ရဲစခန်းက ရဲနဲ့ လုံခြုံရေးအဖွဲ့တွေရောက်လာပြီး လူငယ်တွေကို စစ်မေးတာတွေ ပြုလုပ်ခဲ့တယ်လို့ သိရပါတယ်။
“တာပွန်ရဲစခန်းက ရဲတွေရောက်လာပြီး စာသင်ကျောင်းထဲမှာ လူစုခိုင်းတယ်။ လူငယ် ၃၀ ခန့်ကို မေးတယ်မြန်းတယ်။ ဘယ်သူ့ကိုမှ ဖမ်းသွားတာတော့မရှိပါဘူး” လို့ ဒေသခံကပြောပါတယ်။
နိုဝင်ဘာ ၂၇ ရက်နေ့ ညကလည်း ဒမငယ်ရဲစခန်းနဲ့ သစ်ချိုခြံ(အထွက်တိုးစခန်း) က ပျူတွေကို PDF တွေက ပူးပေါင်းတိုက်ခိုက်ရာ ရဲနဲ့ ပျူစောထီးတွေ ထွက်ပြေးသွားတဲ့အတွက် စခန်းတွေကို မီးရှို့ခဲ့သလို တောင်ညိုစခန်းကိုလည်း လက်နက်ကြီးနဲ့ ပစ်ခတ်တာတွေပြုလုပ်ခဲ့ပါတယ်။
“စုစုစည်းစည်း စည်းစည်းလုံးလုံးနဲ့ လက်နက်ကိုင်တော်လှန်တဲ့သူကလည်း လက်နက်ကိုင်ဖို့လိုအပ်သလို မြေပေါ်မှာရှိတဲ့ အခုရွေးကောက်ပွဲဆန့်ကျင်ကြမဲ့ အင်အားစုတွေကလည်း ခြေသံလုံလုံ နဲ့ စစ်ကောင်စီထောက်တိုင်ဖြစ်တဲ့ ပြည်ခိုင်ဖြိုး ပါတီအင်အားတွေကို ဖြိုဖျက်ပစ်ဖို့လိုတယ်” လို့ ပဲခူးတိုင်းအနောက်ခြမ်းက နိုင်ငံရေးသမားတဦးက ဒို့ပြည် ကိုပြောပါတယ်။
ယမန်နေ့ နိုတင်ဘာ ၂၈ ရက်နေ့ကတော့ နတ်တလင်းထွေအုပ်ရုံးကို PDF တွေ ဝင်စီးမယ်ဆိုတဲ့ သတင်းတွေကြောင့် စာသင်ကျောင်းက ကလေးတွေကို မိဘတွေက ပြန်ခေါ်ခဲ့သလို ရုံးတချို့လည်းပိတ်ခဲ့ပြီး မြို့ထဲမှာ ခြောက်ကပ်သွားတယ်လို့ မြို့ခံတဦးကလည်း ပြောပါတယ်။
ပုံစာ-နတ်တလင်းမြို့ ကျေးရွာတခုက ကြံ့ခိုင်ရေးမဲဆွယ်ဆိုင်းဘုတ်နဲ့ မီးရှို့ခံလိုက်ရတဲ့ ဆိုင်းဘုတ်
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
