🟥 မီးရှို့ခံရတာမရှိဘူးလို့ ကြံ့ခိုင်ရေးအမာခံတွေက ဝါဒဖြန့်
နိုဝင်ဘာ ၂၉၊ ၂၀၂၅။
ပဲခူးတိုင်းအနောက်ခြမ်း၊ နတ်တလင်းမြို့အနောက်ခြမ်းမှာရှိတဲ့ ကျေးရွာ ၂၀ ခန့်က ကြံ့ခိုင်ရေးပါတီမဲဆွယ်ဆိုင်းဘုတ်တွေ မီးရှို့ခံခဲ့ရတဲ့အတွက် ဆိုင်းဘုတ်အသစ်တွေကို ပြန်စိုက်ထားလိုက်ပြီလို့ ဒေသခံတွေဆီက သိရပါတယ်။
မီးရှို့ခံလိုက်ရတဲ့ ဆိုင်းဘုတ်နေရာတွေမှာ ဆိုင်းဘုတ်အသစ်တွေကို နိုဝင်ဘာလ ၂၈ ရက်နေ့ က လွှတ်တော်ကိုယ်စားလှယ်တွေကိုယ်တိုင် လိုက်လံစိုက်ထူသွားတာလို့ ဆိုပါတယ်။
“ရွာစုံပြန်တင်နေတာ။ နတ်တလင်းအနောက်ခြမ်းတခုတည်းကို သူတို့ကအားပြုနေရတာ အရှေ့ခြမ်းကို လုံးဝမဆင်းရဲဘူး။ သူတို့ အတော်နာနေတာ။ အမတ်တွေကိုယ်တိုင်ဆိုင်းဘုတ်ပြန်တင်တာ။ တင့်လွင်ရယ်၊ မြစိုးရယ်၊ ငထွဋ် ရယ် လုံခြုံရေးမပါဘူး။ တင့်လွင်က တယောက်တည်းလျှောက်သွားနေတာ” လို့ မြို့ခံတဦးက ဒို့ပြည် ကို အတည်ပြုပြောပါတယ်။
လက်ရှိမှာတော့ ကြံ့ခိုင်ရေးပါတီကနေ ပြည်သူ့လွှတ်တော်ကိုယ်စားလှယ်လောင်းအဖြစ် ဦးတင့်လွင့်၊ တိုင်းဒေသကြီး(FPTP) လွှတ်တော်ကိုယ်စားလောင်းအဖြစ် ဦးမြစိုး၊ တိုင်းဒေသကြီး(PR) လွှတ်တော်ကိုယ်စားလှယ်လောင်းအဖြစ် ဦးကျော်မင်းထွဋ်၊ အမျိုးသားလွှတ်တော်(FPTP) ကိုယ်စားလှယ်လောင်း ဒေါ်ထားထားနု၊ အမျိုးသားလွှတ်တော်(PR) ဦးသန်းဇော်ထွဋ် တို့ က ဝင်ရောက်ရွေးကောက်ခံကြမှာဖြစ်တယ်လို့ သိရပါတယ်။
နတ်တလင်းမြို့နယ်ထဲက ကျေးရွာ ၂၀ မှာ ကြံ့ခိုင်ရေးဆိုင်းဘုတ်တွေ မီးရှို့ခံရတယ်လို့ နိုဝင်ဘာ ၂၉ ရက်နေ့မှာ ဒို့ပြည် သတင်းဌာနက စုံစမ်းရေးသားဖော်ပြပြီးနောက် ကြံ့ခိုင်ရေးအမာခံတွေက မီးရှို့ခံရတာမရှိဘူးလို့ မှတ်ချက်လာရောက်ရေးသားနေကြတာပဲဖြစ်တယ်လို့ မြိုခံတဦးကလည်း ပြောပါတယ်။
“ကွန်းမန့်ရေးနေတဲ့သူတွေကို သိပါတယ်။ ဇော်မျိုးနိုင်က ကြံ့ခိုင်ရေးမြို့နယ်အလုပ်မှုဆောင်၊ ဘုန်းကြီးရေဆည်က၊ တယောက် လှပခြင်းရွာက၊ တယောက်က ရေမွှေးက အကုန် ကြံ့ခိုင်ရေးအမာခံတွေနဲ့ ဆက်နွယ်သူတွေ အမျိုးတွေချည်းပဲ သူတို့တွေတက်ပြီး မဟုတ်ဘူးလို့ ကွန်းမန့်တွေ ရေးနေတာ” လို့ မြို့ခံက ဒို့ပြည် ကို ပြောပါတယ်။
ပြီးခဲ့တဲ့ နိုဝင်ဘာ ၂၆ ရက်နေ့ ည က ထိပ်ပိတ်၊ ကွက်ကြိး၊ ရွှေကြာပင်၊ အောင်ပင်သာ၊ လှပခြင်း၊ ပွတ်စု၊ နွယ်ခွေ၊ လဲတော၊ တောင်ယာတော၊ ရေမွေး၊ ချောက်ခမ်း၊ ကုလားတက်တွင်း၊ တောင်ရေကန်၊ အောင်ချမ်းသာ၊ ချင်းကုန်းကံ၊ ပွဲသာ၊ ကြာကံ၊ လှေကြပ်ကုန်း၊ ဂွေးကြီး၊ ဂွေးလေး ရွာတွေမှာ စိုက်ထူထားတဲ့ ကြံ့ခိုင်ရေးပါတီမဲဆွယ် ဆိုင်းဘုတ်တွေကို မီးရှို့ခံခဲ့ရတာလို့ သိရပါတယ်။
မီးရှို့ခံရတဲ့နေရာတွေဟာ စစ်ကောင်စီစိုးမိုးထားတဲ့နေရာတွေဖြစ်ပြီး စစ်တပ်ကပြုလုပ်မဲ့ ရွေးကောက်ပွဲအတွက် အားထားရာနေရာတွေလည်း ဖြစ်တဲ့အတွက် မီးရှို့မှုဖြစ်ပွား နိုဝင်ဘာ ၂၇ ရက်နေ့မှာတော့ ဒေသတွင်း လူငယ် ၃၀ ခန့်ကို တာပွန်ရဲစခန်းက လာရောက်စစ်မေးမှုတွေ ပြုလုပ်ခဲ့ပါသေးတယ်။
ပုံစာ-နတ်တလင်းမြို့နယ်ထဲက ကြံ့ခိုင်ရေးမဲဆွယ်ဆိုင်းဘုတ် မီးရှို့မခံရစဉ်ပုံ။
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
