(သရော်စာ)
နိုဝင်ဘာ ၂၄၊ ၂၀၂၅။
နိူဝင်ဘာနေ့လည်ခင်းတစ်ခု၌ ကျွန်ုပ် ဇေယျတု မည်ခေါ် ကိုကိုသရော်သည် ဖုန်းတစ်လုံးနှင့် သမာဓိထူထောင်သခိုက်ဝယ် ကတိုက်ကရိုက်နှင့်ရောက်ရှိလာသူ မောင်မှတ်ကြီးက
” ဟယ်လို ဆာဇေ မင်္ဂလာပါဗျ”
“မင်္ဂလာပါ မောင်မှတ်ရေ၊ဘဇာအရေးကြောင့်များ ကတိုက်ကရိုက်ဖြစ်လာပါလိမ့် ဆာမှတ်”
“ဆာဇေရေ၊ လက်ဝှေ့သမားတွေလေ့ကျင့်တဲ့ သဲအိပ်ဘယ်မှာဝယ်လို့ရလဲဗျ၊ဘယ်လောက်လောက်ပေးရလဲ”
“ဟို လုံးရှည်ရှည်ဟာကြီးလားဟ၊ ဖက်လုံးလိုလိုဘာလိုဟာကြီးလေ”
“ဟုတ်တယ် ဆာဇေ”
“မောင်မှတ်က အခုမှ လက်ဝှေ့သင်မလို့လားဟ၊ ONE မှာသွားကစားမလို့ မှတ်တယ်”
“တောက်တီးတောက်တဲ့ ဆာဇေရယ် လက်ဝှေ့ထိုးဖို့မဟုတ်ပါဘူး၊ ဟို အစိမ်းကောင်ကြီးက ပါတီမဲဆွယ်ပွဲမယ် ပြောသွားတယ်ဆိုပဲဗျ၊ သူရို့ပါတီအစိုးရဖြစ်လို့ ရကပကတိမတည်ရင်မျက်ခွက်ကို လက်သီးလာထိုးလှည့်ဆိုလား”
“ဪ မောင်မှတ်က ကတိမတည်မှာသေချာတယ်ဆိုတဲ့ သဘောကိုစောဖေနောကျေနေလို့ လက်သီးထိုးကျင့်ထားမပေါ့ဟုတ်စ၊ သဲအိပ်ချိတ်ရင်လည်း တန်းခိုင်ခိုင်လုပ်အုန်းကိုယ့်လူ၊ မတော်လူပေါ်ပိနေမှဖြင့် အဟေးဟေး”
“ဆာဇေကလည်း သဲအိပ်ကို မြေပေါ်လှဲထားပြီးအထိုးကျင့်မှာဗျ ဟဲဟဲ”
“ဟ မင့်ဟာက ဘယ့်နှာကြီးတုန်း၊ လက်သီးမာအောင်မဟုတ်ပဲ ဘာမာအောင်ကျင့်မှာတုန်းဟ လခွမ်း”
“ဟုတ်တယ်ဆာဇေရာ၊ ဒင်းမျက်ခွက်က လက်သီးနဲ့မတန်မရာ”
“အေး မဲဆွယ်ပွဲဆိုလို့ ဝါဝါထိန်ထိန်ကြက်သွန်မြိတ်တို့အိမ်က ကုကျေပြောင်ကြီးကလည်း ဗိုလ်ချုပ်အောင်ဆန်းမိန့်ခွန်းပြိုင်ပွဲဝင်တဲ့၂တန်းကျောင်းသားလေသံယူပြီးအားကြီးနက်ပြောချလိုက်တာ နဂံရေးပလက်ဖောင်းကို မဖျက်ဆီးပါနက်၊ ဘော်လီတွေကြပ်ကြပ်ဝတ်ပါဆိုလား”
“လော်ဘီတွေကြပ်ကြပ်သတိထားပါ ဆာဇေရာ၊ တပ်လော်ဘီတွေကိုပြောတာလားဘာလားပဲ ဟဲဟဲ”
“ငတို့ မြီမာပြေကြီးကတော့ အားရီးရီစရာကောင်းတယ်ဟေ့၊ အမေဒိကန်ကြီးက အဟမ်းအဟမ်းပဲလုပ်ရသေးတယ် မအလနဲ့အပေါင်းအပါတသိုက်မှာ ခေါင်းလာရိုက်ခံရသလို ချာလပတ်ကိုရမ်းလို့ဟေ့။ မျောက်မီးခဲကိုင်မိသလိုဆိုတာ ဒါမျိုးမှတ်တယ်။kk ပတ် ဆိုသဟာကြီးမှာ ကြွက်မနိူင်ကျီမီးပတ်ရှို့ကိုဖြစ်လို့။ သတင်းတွေထဲဖတ်ရသလိုဆိုရင်တော့ မအလ တို့အုပ်စုကြီးက သက်သေခံပစ္စည်းတွေပါများ ဖျောက်ဖျက်နေတာလားပဲဟ။ ကေကေမှာက လူတွေရဲ့ကလီစာတွေဖြုတ်တဲ့ထုတ်တဲ့ဆေးရုံဆေးခန်းတွေတောင်ရှိလောက်တယ်ဆိုတာကိုးကွ”
“ဟုတ်ချင်ဟုတ်မှာဗျ။ ဒီကနေ့သတင်းတွေမှာဖုန်းအလုံးပေါင်း၂သောင်းကျော်နဲ့ ကွန်ပျူတာ မော်နီတာတွေကိုကားနဲ့ကြိတ်ပြီး ဖျက်ဆီးတယ်ဆိုလားပဲ”
“စကစမအလတို့အုပ်စုမှာ ကျားဖြန့်ဆိုတာကြီးနဲ့အရူးမီးဝိုင်းနေချိန်မှာပဲ၊နုဂျီတို့အခြမ်းမှာလည်း ကြည်ပြာ ပြဿနာတက်နေသဟေ့”
“ဟုတ်ပ ဆာဇေရေ၊ကျားဖြန့်နဲ့ကြည်ပြာကလည်း ဓာတ်တူနာမ်တူကြီးဗျ။ထူးဆန်းတဲ့တိုက်ဆိုင်မှုကြီးဆိုတော့ စံဇာနည်ဘိုတို့ဇင်ယော်နီတို့လင်းညှို့တာရာတို့ ဟောကိန်းထုတ်သင့်တယ် ဟဲဟဲ”
“အသာထားပါဟ၊အလိုလိုမှ ရှေးဟောင်းလှေဆိုလားနွားစာခေါင်းဆိုလားကြီးတွေနဲ့ဓောင်ကြပ်နောင်ကြပ်ဖြစ်နေရတဲ့ကြားထဲ”
“အေးဗျ ဆာဇေရ၊ နုဂျီဝကခရုံးအမြဲတန်းအတွင်းဝန် ကြည်ပြာမကလည်း အတော်ဆိုးသကိုးဗျ။ စစ်အာဏာရှင်စနစ်ကို အမြစ်ဖြတ်ချေမှုန်းနေပါတယ်ဆိုမှ ဒင်းကခြေပုန်းခုတ်အာဏာရှင်လုပ်နေသတဲ့။ အမြစ်ချိုးမယ့်ဒင်းက အမျိုးချစ်လွန်းပြီး လင်မျိုးလင်နွယ်နဲ့လင်ကမ္ဘာတည် နေသကိုးဗျနော”
“တော်လှန်အစိုးရပိုင်သမျှကို ကြည်ပြာမကအတည်နွှာပြနေလိုက်ပုံများမကြားဝံ့မနာသာတွေချည်းပဲ။ ဝန်ထမ်းတွေလည်း ကြည်ပြာမကိုမသတီရာကနေ အလုပ်ထွက်ကြတာ အယောက် ၂၀နီးပါးပဲ။ ဝန်ထမ်းလစာဆို ကြည်ပြာမရဲ့ခွေးကလေး၂ကောင်အသုံးစားရိတ် အောက်တောင်ရောက်နေဆိုပဲ။ မကျေနပ်လို့တိုင်မယ်တောမယ်လုပ်ရင်လည်း ပီဒက်တွေနဲ့အပြတ်ရှင်းခိုင်းမယ်ဆိုတာတောင်ပါလိုက်သေး၊ ကြည်ပြာမနဲ့လင်တော်မောင် ညီညီမင်းတို့ရဲ့တော်လှန်အစိုးရပိုင်ဘဏ္ဍာငွေတွေကို ထင်တိုင်းကြဲဖြစ်စဥ်တွေကို နုဂျီ အစိုးရဆီတိုင်ကြားစာပို့ထားကြတယ်ဆိုပဲ။ အခုထိအရေးယူမှုတစ်စုံတရာမလာသေးဘူးဆိုတော့ အဟင်းဟင်း ဘာလားပေါ့လကွာ ဟေဟေ့”
“ကျားကြောက်လို့ ရှင်ကြီးကိုး၊ ရှင်ကြီးကျားထက်ဆိုးလာရင်တော့ နုဂျီအစိုးရအနေနဲ့အပြီးဆော်ရမှာဗျ။ အပျော်စီးနေလို့တော့မဖြစ်သေးဘူး။ ဒီတော်လှန်ရေးအတွက်ပေးခဲ့၊ ပေးဆဲအသက်သွေးချွေးတွေ အားနာစရာကောင်းလွန်းတယ်”
“ဟုတ်တယ် မောင်မှတ်ရေ၊ တော်လှန်အစိုးရဆိုတာမျိုးက မလျော်ကန်တာမှန်သမျှတော်လှန်ကြရမှာပဲ။ အဲလိုမှမဟုတ်ရင် ပလိုင်းပေါက်နဲ့ဖားကောက်သလိုဖြစ်ကုန်မှာ။အခုဆို နုဂျီလည်း အသက် ၄ နှစ်ကျော်၅နှစ်ထဲရောက်လာတော့ ပိုးစားခြကိုက်သံလေးတွေညံစပြုပြီပေါ့။ မကြည်ပြာကြီးရေ ခင်များတို့ မောင်ပိုင်မယ်ပိုင်စီးနေတဲ့ငွေကြေးမှန်သမျှက ပြည်သူကြည်ဖြူလို့လှူဒါန်းထားတာတွေဆိုတာသတိထားဗျို့။ အနူတ်ရခက်တဲ့ဆူးတွေပေါ့ဗျာ”
“ဟို မျောက်ကို ဥယျာဥ်မှူးခန့်တဲ့ပုံပြင်လိုဖြစ်နေပြီ ဆာဇေရေ”
“ဘာလဲ သစ်ပင်နဲ့ရင်းနှီးကျွမ်းဝင်လို့ မျောက်ကိုဥယျာဥ်မှူးခန့်လိုက်တာ၊ အပင်တွေအကုန်ဆွဲနူတ်ကြည့်ပြီး အမြစ်ရှည်ရင်ရေများများလောင်း အမြစ်တိုရင်ရေနဲနဲလောင်းဆိုတာလားဟ”
“ဟုတ်တယ်ဆာဇေ၊ နောက်ဆုံးဥယျာဥ်တစ်ခုလုံး ညက်ညက်ကြေရောဆိုတာလေ”
“ကဲ မောင်မှတ်ရေ၊ ငတို့ပြည်သူတွေက ကံကောင်းတယ် အစိုးရလို့ပြောတဲ့ဟာရီး ၂ခုရတယ်။ ဒါပေမယ့်ကံဆိုးတယ် အစိုးရဆိုတာကြီးတစ်ခုက ယုတ်မာကောက်ကျစ်ရက်စက်တယ်၊ နောက်တစ်ခုက ကျပ်မပြည့်ဘူးဆိုတဲ့ဟာသလေးသတိရမိသေးတယ်ဟ။ အခုတော့ မြီမာအစိုးရဆိုတဲ့ဟာရီး၂ခုမှာ စကမ မအလတို့အတွက် ကျားဖြန့်ညှောင့်ဆူးနေသလို၊ နုဂျီတို့အဖွဲ့အတွက်တော့ ကြည်ပြာညှောင့်ပေါ့လေ။ မောင်မှတ်ပြောသလိုဆိုရင်တော့ဓာတ်တူနာမ်တူ ကဖနဲ့ကပ ပေါ့ ဟေးဟေး”
“ဒါတောင် ကြံ့ဖွတ်အုပ်ကထကြီးရဲ့ပါတီရံပုံငွေ သိန်းပေါင်းများစွာကို သူ့ရဲ့သားတော်မောင်ကုမ္ပဏီထဲထိုးထည့်လိုက်တာ မပါသေးဘူး ဆာဇေရေ ဟူးး”
“ဖတ်ခဲ့ဖူးတဲ့အက်ဆေးလေး တစ်ပုဒ်တောင်သတိရသွားသဟ “မကြည်ပြာ စားအုံးဆီခွဲတမ်းမရခဲ့ပါ” ဆိုလားပါပဲ”
ရေးသားသူ-ဇေယျတု
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
