နိုဝင်ဘာ ၂၄၊ ၂၀၂၅။
အမျိုးသားညီညွတ်ရေးအစိုးရ-NUG၊ ပြည်ထောင်စုဝန်ကြီးချုပ်ရုံးရဲ့ အမြဲတမ်းအတွင်းဝန် ဒေါ်ကြည်ပြာ နဲ့ ခင်ပွန်းတို့ကို စုံစမ်းစစ်ဆေးမှုများ ပြုလုပ်နေစဉ် ကာလအတွင်း တာဝန်မှ ယာယီရပ်နားထားတယ်လို့ NUG ကယနေ့ နိုဝင်ဘာ ၂၄ ရက် နေ့လည် ၂ နာရီခန့်က ထုတ်ပြန်ကြေညာပါတယ်။
၂၀၂၅ ခုနှစ် နိုဝင်ဘာလ ၂၂ရက် မှ စတင်ပြီး တာဝန်ကရပ်နားထားလိုက်ပြီဖြစ်ပြီး ဒေါ်ကြည်ပြာနဲ့ အမျိုးသားဖြစ်သူတို့ လုပ်အားခေါင်းပုံဖြတ်တာ၊ ရုံးတွင်းဖိနှိပ်မှု၊ မလျှော်ဩဇာအသုံးချမှု၊ ရုံးကိုကိုယ်ရေးကိုယ်တာကိစ္စတွေအသုံးပြုတာ အပြင် မိသားစုဝင်တွေကို ရာထူးကြီးပေးထားတယ်ဆိုပြီး သက်သေတွေနဲ့တကွ တိုင်တန်းခံထားရတာပါ။
အဲဒီတိုင်တန်းမှုကိုတော့ ၂၀၂၂ ခုနှစ် မှ ၂၀၂၅ ခုနှစ်အထိ ဝန်ကြီးချုပ်ရုံးမှာလုပ်ကိုင်ခဲ့တဲ့ ဝန်ထမ်း ၁၉ ဦးက တိုင်တန်းခဲ့တာဖြစ်ပြီး စုံခုံဖွဲ့စစ်ဆေးဖို့အထိ ပါဝင်သလို ဒေါ်ကြည်ပြာကလည်း သူ့ရဲ့ လူမှုကွန်ရက်စာမျက်နှာကနေ ငြင်းဆိုထားပြီး စစ်ဆေးခံဖို့ အသင့်ရှိတယ်လို့ ဆိုထားပါတယ်။
စစ်ဆေးအရေးယူပေးဖို့တိုင်ကြားစာကိုတော့ ၁၉ နိုဝင်ဘာလ ၂၀၂၅ ရက်စွဲနဲ့ ရရှိခဲ့ပြီး နိုင်ငံတော်ယာယီသမ္မတ၊ ပြည်ထောင်စုဝန်ကြီးချုပ် နဲ့ ပြည်ထောင်စုလွှတ်တော်ကိုယ်စားပြုကော်မတီဥက္ကဋ္ဌ တွေဆီကို လိပ်မူထားတဲ့ တိုင်စာဟာပြည်ထောင်စုဝန်ကြီးချုပ်ရုံးရဲ့ မေးလ်သို့ ရောက်ရှိလာခြင်းမရှိပေမဲ့ နိုင်ငံတော်အကြီးအကဲဖြစ်သူ ယာယီသမ္မတထံရောက်ရှိတဲ့အတွက် အဲဒီကိစ္စကို ဆောင်ရွက်ရန် ပြည်ထောင်စုဝန်ကြီးချုပ်က ၂၀၂၅ ခုနှစ် နိုဝင်ဘာလ ၂၂ ရက်နေ့မှာ စုံစမ်းစစ်ဆေးရေးအဖွဲ့ကို ဖွဲ့စည်းအမိန့်ထုတ်ပြန်ပြီး ဖွဲ့စည်းခဲ့တာလို့ NUG က ထုတ်ပြန်ပါတယ်။
စုံစမ်းစစ်ဆေးရေးအဖွဲ့အနေနဲ့ တိုင်ကြားသူတွေနဲ့ တိုင်ကြားခံရသူတွေ၊ နှစ်ဖက်သက်သေတင်ပြမှုတွေရှိပါက တင်ပြတဲ့သက်သေတွေ တိုင်ကြားမှုတွေနဲ့ပတ်သက်ပြီးစစ်ဆေးရန်လိုအပ်တဲ့ သက်သေတွေကို ခေါ်ယူစစ်ဆေးမှုကို အမြန်ဆုံးဆောင်ရွက်ကာ တွေ့ရှိချက်၊ အကြံပြုချက်တွေကို ဝန်ကြီးချုပ်ထံ ပြန်လည်တင်ပြရန် တာဝန်ပေးအပ်ထားပြီးဖြစ်တယ်လို့ ဆိုပါတယ်။
စုံစမ်းစစ်ဆေးရေးအဖွဲ့အနေနဲ့ ဆောင်ရွက်ရန်ရှိတဲ့ လုပ်ငန်းတွေကို စတင်ဆောင်ရွက်နေပြီး စစ်ဆေးတွေ့ရှိချက်တွေအပေါ်မူတည်လို့ လိုအပ်တဲ့ အရေးယူဆောင်ရွက်မှုတွေကို ဆက်လက်လုပ်ဆောင်သွားမယ် လို့ ဆိုထားပါတယ်။
ပုံစာ-ဝန်ကြီးချုပ်ရုံးအမြဲတမ်းအတွင်းဝန်ဒေါ်ကြည်ပြာ နဲ့ ခင်ပွန်း(ဓါတ်ပုံ-ဒေါ်ကြည်ပြာ လူမှုကွန်ရက်မှ)
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
