နိုဝင်ဘာ ၂၆၊ ၂၀၂၅။
ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ရွာသစ်ကြီးကျေးရွာအုပ်စု၊ ဖိုးခေါင်တိန်ကျေးရွာ လယ်ကန်သင်းမှာ ရောက်ရှိနေတဲ့ မျက်နှာစိမ်းလူငယ်(၂) ဦးကို PDF မသင်္ကာမှုနဲ့ စစ်ကော်မရှင်တပ်ဖွဲ့က ပစ်ခတ်ခဲ့တာလို့ ဒေသခံတွေဆီက သိရပါတယ်။
ပြီးခဲ့တဲ့ နိုဝင်ဘာ ၁၇ ရက်နေ့ ညနေ ၅ နာရီခွဲခန့်က မှတ်တိုင်ရဲစခန်းနဲ့ (၁) မိုင်ခန့်သာဝေးတဲ့ ဖိုးခေါင်တိန်ကျေးရွာ လယ်ကွင်းဘောင်၊ ဇီးပင်အောက်မှာ နားနေကြတဲ့ အသက် ၂၀ ခန့်ရှိ လူငယ် ၂ ဦးကိုတွေ့ရကြောင်း ဒေသခံတဦးက ဖုန်းဆက်အကြောင်းကြားရာက မှတ်တိုင်ရဲစခန်းက တပ်ဖွဲ့ဝင်တွေရောက်လာကြပြီး ဝိုင်းဝန်းပစ်ခတ် ဖမ်းဆီးသွားတာလို့ ဒေသခံက ပြောပါတယ်။
“ဘောင်ဆိုတာရှိတယ်။ အဲဘောင်ပေါ်က ဇီးပင်အောက်မှာ သူတို့နေနေတဲ့အချိန် မှတ်တိုင်ရဲစခန်းကို ဖုန်းဆက်ပြီးခေါ်တဲ့ သတင်းပေးရှိတယ်။ ချက်ချင်းရောက်လာပြီးဝိုင်းပစ်တော့တာ။ ရွာနဲ့ကလည်းအတော်နီးတယ်။ တယောက်တော့ အရှင်ဖမ်းမိသွားတယ်။ တယောက်တော့နေရာမှာတင်သေနတ်မှန်ပြီး သေသွားတယ်။” လို့ ဒေသခံက ဒို့ပြည် ကိုပြောပါတယ်။
သေဆုံးသွားတဲ့ လူငယ်ကိုတော့ နာရေးကားနဲ့ ဖိုးခေါင်တိန်ရွာထဲကဖြတ်သယ်သွားပြီး၊ အရှင်ဖမ်းမိသူကိုလည်း လက်ပြန်ကြိုးတုပ် ကာ မှတ်တိုင်ရဲစခန်းကို ဖမ်းဆီးခေါ်ဆောင်သွားတယ်လို့ ဆိုပါတယ်။
“ရဲရောစစ်သားရော အင်အား သုံးဆယ်လောက်တော့ပါတယ်။ အပစ်ခံရတဲ့ လူငယ်တွေကတော့ ဘယ်ကမှန်းမသိဘူး။ PDF ဆိုပြီးလုပ်သွားကြတာပဲ။ ဒီအနီးနားမှာလည်း မတွေ့ဖူးဘူး။” လို့ ဒေသခံက ပြောပါတယ်။
ပစ်ခတ်မှုဖြစ်ရာ နေရာနဲ့ ဖိုးခေါင်တိန်ရွာဟာ မိနစ် ၂၀ ခန့်လမ်းလျှောက်ရပြီး မှတ်တိုင်ရဲစခန်းနဲ့ ဖိုးခေါင်တိန်ရွာဟာလည်း (၁) မိုင်ကျော် ခန့်သာ ကွာဝေးတယ်လို့ ဆိုပါတယ်။
ဖြစ်စဉ်ဖြစ်ပွားပြီး ၂ ရက်အကြာခန့်မှာတော့ ဖိုးခေါင်တိန်ရွာထဲနဲ့ ရွာထိပ်တွေမှာ စစ်သားတွေ ဆိုင်ကယ်တွေနဲ့ ကင်းလှည့်တာတွေရှိနေပြီး ညမှသာ ပြန်ကြတယ်လို့ သိရပါတယ်။
အဲဒီဒေသဟာ ပဲခူးရိုးမနဲ့ ဆိုင်ကယ်စီးခရီး ၂ နာရီခန့် မောင်းရပြီး တော်လှန်ရေးတပ်ဖွဲ့တွေ ဝင်ထွက်သွားလာတတ်တဲ့ ဒေသတွေဖြစ်ပြီး သေဆုံးသူနဲ့ ဖမ်းဆီးခံရသူဟာ ဘယ်သူတွေဆိုတာ လက်ရှိအချိန်ထိ မသိရေသးသလို တော်လှန်ရေးတပ်ဖွဲ့တွေက သတင်းထုတ်ပြန်တာလည်း မရှိသေးပါဘူး။
#ဒို့ပြည်
ဒီချန်နယ်တွေကလည်း သတင်းနဲ့ ရုပ်သံတွေကို ဖတ်ရှု့နိုင်ပါတယ်။
YouTube- https://www.youtube.com/@Doh-Pyaynews ( YouTube ကိုလည်း Subscribe လုပ်ပေးကြဖို့ မေတ္တာရပ်ခံပါတယ် )
Website- https://dohpyay.com/
Telegram- t.me/dohpyay
